Astana qalasynyŋ äkımı Jeŋıs Qasymbek Instagram paraqşasynda Qajymūqan Mūŋaitpasov atyndaǧy äigılı futbol stadionynyŋ qūrylysy aiaqtalǧany turaly jazdy
«Qajymūqan Mūŋaitpasov atyndaǧy futbol stadionynyŋ qūrylysyn tolyqtai aiaqtadyq. Aŋyzǧa ainalǧan būl stadionnyŋ tarihy 1936 jyldan bastau alady jäne bügın ol qaita jaŋǧyryp, zamanaui kelbetke ie boldy.
Bügın QR Bas prokurory Berık Asylovpen bırge qūrylys jūmysy tolyq aiaqtalǧan nysandy aralap kördık. Stadion Arnaiy memlekettık qordyŋ qarajaty esebınen salyndy. Bas prokuratura zaŋsyz jolmen iemdenılgen aktivterdı memleketke qaitaru baǧytynda jüielı jūmys jürgızıp keledı.
Sport nysanynyŋ jalpy audany 18 myŋ 951 şarşy metrdı qūraidy. Stadion UEFA-nyŋ 2-sanatyna sai keledı jäne 3 myŋ 600 körermenge arnalǧan. Stadion UEFA men Qazaqstan futbol federasiiasynyŋ standarttaryna sai keletın zamanaui sport jabdyqtarymen jäne jasandy jabynmen qamtamasyz etılgen.
Nysanda körermenge arnalǧan tribunalar, konferens-zal, kiım auystyratyn bölmeler, medisinalyq kabinetter, äkımşılık blok pen tehnikalyq aimaqtar, sondai-aq VIP-lojalar qarastyrylǧan.
Sol siiaqty stadionda jattyǧu ötkızıp jatqan balalar-jasöspırımder sport mektebınıŋ tärbielenuşılerımen äŋgımelestık.
Jobany ıske asyru elordanyŋ sport infraqūrylymyn damytuǧa jäne qalalyq ärı respublikalyq deŋgeidegı jarystardy ötkızu üşın zamanaui jaǧdailar jasauǧa baǧyttalǧan.
Qazırgı uaqytta nysandy paidalanuǧa beru boiynşa zaŋdyq jäne ūiymdastyruşylyq räsımder jürgızılıp jatyr. Aldaǧy uaqytta stadion Astana qalasy äkımdıgınıŋ «№8 olimpiadalyq rezervtıŋ mamandandyrylǧan balalar-jasöspırımder sport mektebı» KMM teŋgerımınde bolady.
Stadionnyŋ tolyqtai aşyluy 4 mausymǧa josparlanyp otyr. Ol 2013 jyly tuǧan jasöspırımder arasynda BJSM men ORMBJSM komandalary qatysatyn Qazaqstan Respublikasynyŋ jyl saiynǧy futbol chempionaty aiasynda ötedı. Chempionatqa elımızdıŋ türlı öŋırlerınen mamandandyrylǧan balalar-jasöspırımder sport mektepterı, olimpiadalyq rezerv mektepterı men futbolşylar daiarlau ortalyqtary atynan eŋ myqty 15 komanda qatysady.
Turnir Qazaqstandaǧy balalar-jasöspırımder futboly jüiesındegı maŋyzdy respublikalyq jarystardyŋ bırı bolyp sanalady jäne būqaralyq sportty damytuǧa, balalar men jasöspırımder arasynda futboldy nasihattauǧa, sondai-aq jas sportşylardyŋ daiarlyq deŋgeiın arttyruǧa baǧyttalǧan», – dep jazdy Jeŋıs Qasymbek.