بيىلعى باسەكەگە 200-دەن استام اۋەسقوي سپورتشى قاتىستى. قاتىسۋشىلار سايىس بارىسىندا 1,9 شاقىرىم ءجۇزۋ، 90 شاقىرىم ۆەلوسيپەدپەن ءجۇرىپ ءوتۋ، 21,1 شاقىرىم جۇگىرۋ بويىنشا سىنعا ءتۇستى.
استاناداعى جارىسقا قازاقستاننىڭ وزگە وڭىرلەرىنەن بولەك، رەسەي، وزبەكستان، قىرعىزستان ەلدەرىنەن دە كەلگەندەر بار.
«وزدەرىڭىز بىلەتىندەي، 2023 جىلى حالىقارالىق Ironman 70.3 جارىسىنىڭ كەلىسىمشارتى اياقتالدى. ەندى بيىل استانا ترياتلون فەدەراتسياسى العاش رەت وسىنداي ءتۋرنيردى ۇيىمداستىرۋعا بەل بۋدىق. اۋا رايى وتە جاقسى. 180 قاتىسۋشى جەكە جانە 20-دان استام سپورتشى كوماندالىق ەكيدەن تۇرىندە جۇلدەگە تالاستى. باستى سىيلىعىمىز – تامىز ايىندا وزبەكستاندا وتەتىن Samarkand Challenge سايىسىنا جولداما بەرەمىز. فەدەراتسيا بۇل سايىسپەن شەكتەلمەيدى. الداعى اپتادا ءداستۇرلى Astana run challenge جۇگىرىسى جوسپارلانعان»، – دەدى استانا قالاسى ترياتلون فەدەراتسياسىنىڭ پرەزيدەنتى تولەپبەرگەن سۇيىنتاەۆ.
جارىس سوڭىندا ءار جاس توبىنداعى ترياتلون جەڭىمپازدارى (18-29 جاس، 30-39 جاس، 40-49 جاس، 50-59 جاس جانە 60 جاستان جوعارى) ديپلومدارمەن، مەدالدارمەن ماراپاتتالدى.
ءىس-شارانىڭ وتۋىنە بايلانىستى اسىرەسە ۆەلوجارىس باعىتى وتەتىن كوشەلەردە قالا كوشەلەرىنىڭ كەيبىر ۋچاسكەلەرىندە كولىك قوزعالىسى ۋاقىتشا شەكتەلەدى.
ۆەلوجارىس باعىتى:
• باستالۋى – ورتالىق ساياباق (ورتالىق جاعاجاي ماڭى);
• تۇران داڭعىلىنا شىعىپ، كوپىر استىمەن سولعا بۇرىلۋ;
• تۇران داڭعىلىمەن قورعالجىن تاسجولىنا دەيىن (وڭ جاق جولاقپەن) ءجۇرۋ;
• قورعالجىن تاسجولىنان وڭعا بۇرىلىپ، اينالما جولعا دەيىن ءجۇرۋ (وڭ جاق جولاق);
• اينالما جولدا سولعا بۇرىلىپ، قارسى باعىتتاعى جولاقپەن ءجۇرۋ;
• كەيىن 3 شەڭبەر بويىنشا قورعالجىن تاسجولىنان قوسشى (قارقارالى) باعىتىنا دەيىن سول جاق جولمەن ءجۇرۋ;
• شەڭبەرلەردى اياقتاعان سوڭ، قايتادان قورعالجىن تاسجولىنا ءتۇسىپ، يلينكا جاقتان ۆەلوجولعا كىرۋ.