پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ توراعالىعىمەن تۋريزم سالاسىن دامىتۋ ماسەلەلەرى جونىندەگى ۇيلەستىرۋ كەڭەسىنىڭ العاشقى وتىرىسى ءوتتى. كەڭەس 2026 جىلعى ساۋىردە تۋريزم سالاسىنداعى ورتالىق مەملەكەتتىك ورگانداردىڭ، بيزنەس وكىلدەرى مەن ساراپشىلار قاۋىمداستىعىنىڭ جۇمىسىن ۇيلەستىرەتىن تۇراقتى ۆەدومستۆوارالىق الاڭ رەتىندە قۇرىلعان.
وتىرىسقا تۋريزم جانە سپورت، ەكولوگيا جانە تابيعي رەسۋرستار، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرىنىڭ، جەرگىلىكتى اتقارۋشى ورگانداردىڭ، سونداي-اق بيزنەس-قوعامداستىقتىڭ وكىلدەرى قاتىستى.
ۇيلەستىرۋ كەڭەسىنىڭ باستى ماقساتى – سالاداعى جۇيەلى كەدەرگىلەردى جويۋ، ناقتى قولدانبالى شەشىمدەر ازىرلەۋ جانە تۋريزم باعىتىنداعى جوبالاردىڭ ىسكە اسىرىلۋىن جەدەلدەتۋ. كەڭەستىڭ قۇرىلۋى تۋريزم سالاسىن كەشەندى باسقارۋ قاجەتتىلىگىنەن تۋىنداپ وتىر. ويتكەنى بۇل باعىت ينفراقۇرىلىم، ينۆەستيتسيا، كولىك، ەكولوگيا، ۆيزالىق-كوشى-قون رەتتەۋى جانە تسيفرلاندىرۋ سياقتى ءوزارا بايلانىستى بىرنەشە سالانى قامتيدى.
جيىن بارىسىندا تۋريزم جانە سپورت ۆيتسە-ءمينيسترى باۋىرجان راپيكوۆ تۋريستىك سالانى دامىتۋدىڭ 2029 جىلعا دەيىنگى تۇجىرىمداماسىن ىسكە اسىرۋ جونىندەگى جاڭارتىلعان ءىس-قيمىل جوسپارىن تانىستىردى. قۇجاتتا التى نەگىزگى باعىت بويىنشا 61 ءىس-شارا قاراستىرىلعان. ولاردىڭ قاتارىندا ينفراقۇرىلىمدى دامىتۋ، ينۆەستيتسيالىق احۋالدى جاقسارتۋ، تۋريستىك ونىمدەردى قالىپتاستىرۋ جانە سالانى ىلگەرىلەتۋ ماسەلەلەرى بار.
وتىرىستا حالىقارالىق قوناقۇي برەندتەرىنىڭ قازاقستان نارىعىنداعى ۇلەسىن ارتتىرۋ جانە ەلىمىزدىڭ تۋريستىك الەۋەتىن شەتەلدىك نارىقتاردا جۇيەلى تۇردە ىلگەرىلەتۋ ماسەلەلەرىنە ەرەكشە نازار اۋدارىلدى. سونىمەن قاتار اۆتوتۋريزم، ات ءتۋريزمى، گاسترونوميالىق تۋريزم جانە MICE-تۋريزم سياقتى باعىتتاردى دامىتۋ، ءىس-شارالار كۇنتىزبەسىن جەتىلدىرۋ جانە ۆيزالىق ساياساتتى وڭتايلاندىرۋ ماسەلەلەرى قارالدى.
بۇدان بولەك، اڭشىلىق ءتۋريزمنىڭ الەۋەتى مەن ونىڭ دامۋىنا كەدەرگى كەلتىرىپ وتىرعان فاكتورلار تالقىلاندى. ۇلتتىق پاركتەردەگى ەكوتۋريزمدى دامىتۋ، تۋريستىك جۇكتەمەنى رەتتەۋ، سونداي-اق تاريحي-مادەني مۇرا وبەكتىلەرىن تۋريستىك اينالىمعا ەنگىزۋ ماسەلەلەرى دە كەڭىنەن قاراستىرىلدى.
كەڭەس قورىتىندىسى بويىنشا ايدا بالاەۆا ءتۋريزمنىڭ ەل ەكونوميكاسىن دامىتۋعا تىكەلەي ىقپال ەتەتىن ماڭىزدى سالالاردىڭ ءبىرى ەكەنىن اتاپ ءوتتى. ول وڭىرلەرمەن ءوزارا جۇمىستى كۇشەيتۋدى، ءار وبلىستىڭ ەرەكشەلىگىن، تۋريستىك الەۋەتىن جانە ينفراقۇرىلىمدىق مۇمكىندىكتەرىن ەسكەرە وتىرىپ، ناقتى ءارى ەگجەي-تەگجەيلى جوسپارلار ازىرلەۋدى تاپسىردى.
ۇكىمەت باسشىسىنىڭ ورىنباسارى ارحەولوگيالىق ەسكەرتكىشتەر مەن جەكەلەگەن ارحەولوگيالىق ايماقتارعا ايرىقشا كوڭىل ءبولۋ قاجەتتىگىن دە اتاپ ءوتتى.
@KZgovernment