Biyl ol erekşe formatta ūiymdastyryldy. Bılım beru salasy qyzmetkerlerın dästürlı marapattaumen qatar, alǧaş ret jūmysşy mamandyqtarynyŋ ökılderıne de qūrmet körsetıldı.

Būl jaŋaşyldyq Memleket basşysynyŋ bastamasymen jariialanǧan Jūmysşy mamandyqtary jyly aiasynda jüzege asyrylyp, tek pedagog eŋbegınıŋ ǧana emes, sondai-aq bılım beru men balalardyŋ igılıgıne üles qosatyn barlyq mamandardyŋ maŋyzyn aiqyndaudy maqsat ettı.

Keŋestıŋ ekınşı bölımınde Oqu-aǧartu ministrı Ǧani Beisembaev üzdık bılım beru qyzmetkerlerıne, sondai-aq jūmysşy mamandyqtarynyŋ ökılderıne jäne bılım salasymen özara bailanystaǧy ūiymdardyŋ qyzmetkerlerıne marapattar tabystady. Marapat ielerınıŋ qatarynda mektepter men balabaqşalardyŋ tehnikalyq qyzmetkerlerı, sondai-aq poliseiler, medisina qyzmetkerlerı, qūrylysşylar jäne basqa da mamandar bar.

«Bılım beru salasy – bız barlyq balalarymyzdy tärbieleitın orta. Ärkım elımızdıŋ bolaşaǧyn tärbielı, käsıbi qūzyrettı etuge öz ülesın qosuy tiıs. Būl – tek pedagog qauymnyŋ ǧana emes, bükıl qoǧamnyŋ mındetı», – dep atap öttı öz sözınde ministr Ǧani Beisembaev.

Sonymen bırge, airyqşa tabysqa jetken jäne basqaruda joǧary şeberlık körsetken bılım beru ūiymdarynyŋ basşylary vedomstvolyq marapattarǧa ie boldy.

Oqu-aǧartu ministrlıgınıŋ baspasöz qyzmetı