Taŋǧy şapaqpen bırge Baqanas baǧytyndaǧy keŋ dalada Ūly dalanyŋ ruhyn, ūrpaqtar sabaqtastyǧy men ūlttyq bıregeilıktı därıpteitın auqymdy etnosporttyq şara öz jalauyn köterdı.

Aşylu räsımı taqyryptyq körmenı aralaudan jäne qatysuşy komandalardyŋ saltanatty şeruınen bastaldy. Memlekettık Gimn oryndalyp, qatysuşylar Ūly Otan soǧysynda qaza tapqandardy bır minut ünsızdıkpen eske aldy. Erekşe ruhani äser qaldyrǧan sät – Qazaqstannyŋ halyq ärtısı Doshan Joljaqsynovtyŋ bergen batasy boldy.

Almaty oblysynyŋ äkımı Marat Sūltanǧaziev öz qūttyqtau sözınde marafonnyŋ män-maŋyzyn atap öttı:

"Ūly dala joryǧy – būl jai ǧana sporttyq jarys emes. Būl – ūrpaqtar arasyndaǧy ruhani sabaqtastyqty jalǧap, tarihi jadymyz ben ūlttyq ruhty jaŋǧyrtatyn maŋyzdy alaŋ. Bız osy marafon arqyly ata-babalarymyzdyŋ bai mädenietın därıptep, öŋıraralyq jäne halyqaralyq yntymaqtastyqty nyǧaitamyz"

«Amanat» partiiasynyŋ atqaruşy hatşysy Däulet Kärıbek jobanyŋ Memleket basşysy Qasym-Jomart Toqaevtyŋ bastamalaryna sai keletının atap öttı:

"Ūlttyq sport türlerı men mädeni mūrany damytu – memlekettık saiasattyŋ basym baǧyttarynyŋ bırı. “Ūly dala joryǧy” – qazaq örkenietınıŋ bailyǧy men qonaqjai dästürın älemge paş etetın bıregei joba".

Senator, «JORYQ» federasiiasynyŋ qūrmettı prezidentı Darhan Qydyrälı jobanyŋ tereŋ tarihi maŋyzyn airyqşa atap öttı:

"Ūly dala joryǧy – būl jai ǧana bäige emes, ata-babalar jürıp ötken jolmen qaita sapar şegetın tarihi ekspedisiia. Būl – köşpelı örkeniettıŋ ruhyn sezınu, uaqyttar arasyndaǧy bailanysty nyǧaitu jäne ūlttyq mūrany keler ūrpaqqa amanattau".

«JORYQ» federasiiasynyŋ prezidentı Baqytjan Tūrlybekov qatysuşylarǧa sättılık tıledı.

Biylǧy marafonǧa 19 komanda qatysuda: onyŋ 13-ı – Qazaqstan öŋırlerınen, al 6 komanda şetelderden kelgen. Olar – Oŋtüstık Afrika Respublikasy, Vengriia, İran, Qyrǧyzstan jäne Tatarstan (RF). Qatysuşylarǧa bes kün ışınde 500 şaqyrymdyq dala jolyn eŋseru mındetı tūr.

Almaty oblysynyŋ äkımdıgı