سىر ەلىنىڭ سالەمىن ەلىمىزدىڭ شىعىسىنا جەتكىزگەن دەلەگاتسيانى وبلىس اكىمى نۇرلىبەك نالىباەۆ باستاپ باردى. دەلەگاتسيا قۇرامىندا پارلامەنت سەناتى مەن ءماجىلىسىنىڭ دەپۋتاتتارى ن.بايقاداموۆ، ر.رۇستەموۆ، م.ەرگەشباەۆ، وبلىستىق ارداگەرلەر كەڭەسىنىڭ توراعاسى س.دۇيسەنباەۆ، ايماق ارداگەرلەرى، زيالى قاۋىم وكىلدەرى، تۇرماعامبەت اتىنداعى حالىق اسپاپتار، سيمفونيا وركەسترلەرى، «سىر سامالى» ۆوكالدى-اسپاپتى، «توميريس» بي انسامبلدەرى، حور ۇجىمى، باسقا دا ونەرپازدار بار.
شىعىس قازاقستان وبلىستىق فيلارمونياسىندا «سىر ءوڭىرى – تۇركى وركەنيەتىنىڭ التىن بەسىگى» اتتى كورمە اشىلىپ، قىزىلوردا وبلىسىنىڭ اكىمى نۇرلىبەك نالىباەۆ، شىعىس قازاقستان وبلىسىنىڭ اكىمى نۇرىمبەت ساقتاعانوۆ جانە وسكەمەندىكتەر
قىزىلوردا وبلىستىق تاريحي-ولكەتانۋ مۋزەيى قورىنداعى قۇندى جادىگەرلەرمەن تانىستى.
كەيىنگى جىلدارى مۋزەي قورى ەجەلگى قالالار ورنىنان تابىلعان جادىگەرلەردى نەگىزگە الىپ قايتا جاڭعىرتىلعان «شىرىك رابات ساق جاۋىنگەرى»، «سىعاناق حانشايىمى»، «تۇگىسكەن كوسەمى»، «جەتىاسار اقسۇيەك ايەلى» ارحەولوگيالىق رەكونسترۋكتسيالارىمەن تولىققان بولاتىن. بۇگىنگى كورمەگە كەلۋشىلەر وسى جادىگەرلەرگە ەرەكشە نازار اۋداردى.
ارحەولوگيالىق ەكسپەديتسيالار كەزىندە تابىلعان التىندار كوللەكتسياسى دا وسى جەردەن ورىن العان. ەجەلگى وركەنيەتتىڭ بەسىگى سانالاتىن شىرىك رابات جانە ءبابىش مولا قالاشىقتارىنان تابىلعان التىن جاپسىرمالار سول ءداۋىردىڭ كوزىندەي. سونداي-اق، كورمەگە ورتا عاسىرلاردا ساۋدا-ساتتىق پەن مادەنيەتى وركەندەگەن سىعاناق قالاشىعىنان تابىلعان التىن سىرعالار، تۇمار، تۇيمەلەر جانە مارجان مونشاقتاردىڭ تۇپنۇسقا كوللەكتسياسى قويىلعان. شىعىس جۇرتشىلىعى جانكەنت، اساناس، قىشقالا، سىعاناقتان تابىلعان تەرراكوتالار، گلازۋرلى قاپتامالار، قىش ىدىستار جانە بيدايىقاسار قالاشىعىنان تابىلعان قوسساز دومبىرا كوشىرمەسىن دە قىزىعا تاماشالادى.
كورمەدەگى زەرگەرلىك جانە تۇرمىستىق بۇيىمداردىڭ ورنى بولەك. وڭىرجيەك، جىرعا، القا، اعاش جيھازدار، ىدىستار، تەرى بۇيىمدارى سىر بويىندا قولونەردىڭ باي مۇراسى ساقتالعانىن كورسەتەدى. قارۋ-جاراق كوللەكتسياسىنداعى قىلىش، ايبالتا، سەمسەر، شوقپار، نايزا، قالقان، جەبە تاريحتان سىر شەرتەدى.
«دەدە قورقىت» كىتابىنىڭ درەزدەن نۇسقاسى، نار قوبىز، يۋنەسكو سەرتيفيكاتى، كادەسىيلار، مارال يشاننىڭ كوك اساسى، كەرەي ەرىنىڭ تۇپنۇسقاسى، قالقاي يشان، سەردالى بەكشورين، ەر سەيتپەنبەت، بۇقارباي باتىردىڭ مورلەردىڭ كوشىرمەلەرى دە كورمەگە كەلۋشىلەر قىزىعۋشىلىعىن تۋعىزدى.
سونداي-اق، ابايدىڭ 1922 جىلى جارىق كورگەن ولەڭدەر جيناعى مەن قىزىلوردانىڭ استانا بولعان كەزەڭىنىڭ فوتو جانە ارحيۆ قۇجاتتارى كورمە قۇندىلىعىن ارتتىرا ءتۇستى.
ەسكە سالايىق، كەشە "سىر ءوڭىرى - تۇركى وركەنيەتىنىڭ التىن بەسىگى" كورمەسى اباي وبلىسىنىڭ جۇرتشىلىعىنا ۇسىنىلدى.
قىزىلوردا وبلىسى اكىمىنىڭ ءباسپاسوز قىزمەتى
