زاڭسىز ميكروكرەديت بەرۋ بويىنشا كەڭ اۋقىمدى سحەما اشكەرەلەندى.

ول ەلىمىزدىڭ ءار وڭىرىندە 200-گە جۋىق فيليالى بار، كوميسسيالىق دۇكەندەر رەتىندە جاسىرىنعان ءىرى لومباردتار جەلىسى ارقىلى جۇزەگە اسىرىلعان.

اتاپ ايتقاندا، «اكتيۆ لومبارد» جەلىسىنىڭ يەسى كوينوۆ س.س. سەنىمدى ادامدارىنا «اكتيۆ ماركەت» برەندىمەن تىركەلگەن بىرنەشە كومپانيا راسىمدەگەن.

ولار تاۋارلار مەن تۇرمىستىق تەحنيكانى قابىلدايتىن كوميسسيالىق دۇكەن رەتىندە كورسەتىلگەنىمەن، ءىس جۇزىندە ليتسەنزياسىز لومباردتىق قىزمەت – مۇلىكتى كەپىلگە قويۋ ارقىلى قارىز بەرۋمەن اينالىسقان.

كوميسسيالىق دۇكەندەر مەن لومباردتار ءبىر عيماراتتا ورنالاسىپ، ءبىر پەرسونالدى پايدالانعان.

زاڭناماعا سايكەس، قىسقا مەرزىمدى قارىزدار (45 كۇنگە دەيىن) بويىنشا سىياقىنىڭ ەڭ جوعارى مولشەرلەمەسى تاۋلىگىنە 0,3%-دان اسپاۋعا ءتيىس.

الايدا كوينوۆ س.س.-تىڭ كومپانياسى 15 كۇنگە 16,2% سىياقىمەن قارىز بەرگەن، بۇل زاڭدا بەلگىلەنگەن شەكتەن 4 ەسە ارتىق.

وسىلايشا، ءجۇز مىڭداعان ازامات، سونىڭ ىشىندە زەينەتكەرلەر مەن از قامتىلعان وتباسىلار قارىز تۇزاعىنا تۇسكەن.

سوڭعى ەكى جىلدا زاڭسىز جوعارى مولشەرلەمەمەن كەپىلدىك قارىز بەرۋ ارقىلى 3,5 ملرد تەڭگەدەن استام قاراجات زاڭسىز وندىرىلگەن.

تۇسكەن كىرىستەردى ودان ءارى زاڭداستىرۋ ءۇشىن كوينوۆ س.س. بايلانىسى بار كومپانيالارمەن باعدارلامالىق قامتاماسىز ەتۋدى ەنگىزۋ جانە سۇيەمەلدەۋ بويىنشا جالعان كەلىسىمشارتتار راسىمدەگەن. ونىڭ جالپى سوماسى – 1,9 ملرد تەڭگە.

كەيىن بۇل قاراجات جەكە دەپوزيتتىك شوتىنا ديۆيدەند تۇرىندە اۋدارىلعان.

قازىرگى ۋاقىتتا ەلىمىزدىڭ بارلىق وڭىرلەرىندە 200-دەن استام ءتىنتۋ جۇرگىزىلىپ، زاتتاي دالەلدەمەلەر الىندى.

سوتقا دەيىنگى تەرگەۋ جالعاسۋدا.

وزگە اقپارات قپك-ءنىڭ 201-بابىنا سايكەس جاريا ەتىلمەيدى.

قارىز الۋشىلاردىڭ نازارىنا: قارجى رەتتەۋشىسىنىڭ ليتسەنزياسى بار «اكتيۆ لومبارد» جەلىسىنىڭ قىزمەتى سوتقا دەيىنگى تەرگەۋ نىسانىنا جاتپايدى. اگەنتتىك ونىڭ بىردە-ءبىر فيليالىن جاپقان جوق، «اكتيۆ ماركەتكە» كەپىلگە قويىلعان مۇلىك تە تاركىلەنگەن جوق، ول «اكتيۆ لومباردتىڭ» يەلىگىندە.

سونىمەن قاتار، قما ازاماتتاردان زاڭسىز سىياقى الۋ فاكتىلەرى بويىنشا تاعى 14 ءىستى تەرگەپ جاتىر. كۇدىكتى رەتىندە 15 تۇلعا تانىلدى.

وسىعان بايلانىستى، ميكروكرەديتتىك قىزمەتپەن اينالىساتىن كاسىپكەرلەردى قارىز الۋشىلاردىڭ قۇقىقتارى مەن زاڭدى مۇددەلەرىن قاتاڭ ساقتاۋعا شاقىرامىز. ازاماتتاردان زاڭسىز جوعارى سىياقى مولشەرلەمەسىن العان جاعدايدا كىنالى تۇلعالار زاڭدا بەلگىلەنگەن جاۋاپكەرشىلىككە تارتىلادى.

قر قما ءباسپاسوز قىزمەتى