سەمەي قالاسىندا ابايدىڭ 180 جىلدىعىنا ارنالعان «سۇلۋ سىردان - ۇلى اباي ەلىنە» اتتى قىزىلوردا وبلىسىنىڭ ونەر كۇندەرى ءوتتى. وبلىس اكىمى نۇرلىبەك نالىباەۆ باستاعان دەلەگاتسيا قۇرامىندا پارلامەنت سەناتى مەن ءماجىلىسىنىڭ دەپۋتاتتارى ن.بايقاداموۆ، ر.رۇستەموۆ، م.ەرگەشباەۆ، وبلىستىق ارداگەرلەر كەڭەسىنىڭ توراعاسى س.دۇيسەنباەۆ، ايماق ارداگەرلەرى، زيالى قاۋىم وكىلدەرى، تۇرماعامبەت اتىنداعى حالىق اسپاپتار، سيمفونيا وركەسترلەرى، «سىر سامالى» ۆوكالدى-اسپاپتى، «توميريس» بي انسامبلدەرى، حور ۇجىمى، باسقا دا ونەرپازدار بار.

الدىمەن سەمەيدەگى اباي اتىنداعى تەاتردا «سىر ءوڭىرى – تۇركى وركەنيەتىنىڭ التىن بەسىگى» اتتى كورمە اشىلدى. ونى قىزىلوردا وبلىسىنىڭ اكىمى نۇرلىبەك نالىباەۆ، اباي وبلىسىنىڭ اكىمى بەرىك ءۋالي ارالاپ كوردى.

قىزىلوردا وبلىستىق تاريحي-ولكەتانۋ مۋزەيى قورىنداعى قۇندى جادىگەرلەردەن جاساقتالعان كورمە 3 بولىمنەن تۇرادى.

ونداعى «شىرىك رابات ساق جاۋىنگەرى»، «سىعاناق حانشايىمى»، «تۇگىسكەن كوسەمى»، «جەتىاسار اقسۇيەك ايەلى» ارحەولوگيالىق رەكونسترۋكتسيالارى ارحەولوگيالىق-ەتنوگرافيالىق ەكسپەديتسيالار كەزىندە تابىلعان جادىگەرلەردى نەگىزگە الىپ جاسالعان. 

كەلۋشىلەر نازارىنا ارحەولوگيالىق التىندار كوللەكتسياسى، اتاپ ايتقاندا شىرىك رابات جانە ءبابىش مولا قالاشىقتارىنان تابىلعان التىن جاپسىرمالار، سىعاناق قالاشىعىنان تابىلعان التىن سىرعالار، تۇمار، تۇيمەلەر جانە مارجان مونشاقتاردىڭ تۇپنۇسقا كوللەكتسياسى ۇسىنىلدى. جانكەنت، اساناس، قىشقالا، سىعاناقتان ت.ب. تابىلعان تەرراكوتالار، گلازۋرلى قاپتامالار، قىش ىدىستار جانە بيدايىقاسار قالاشىعىنان تابىلعان قوسساز دومبىرا كوشىرمەسى دە اباي ەلى تۇرعىندارىنىڭ قىزىعۋشىلىعىن تۋعىزدى. 

كورمەگە قويىلعان زەرگەرلىك بۇيىمدار كوللەكتسياسىنىڭ تاريحى باي. سىر بويىنىڭ قازاق ايەلدەرى تاعىنعان كۇمىس اشەكەيلەردىڭ، ياعني وڭىرجيەك، جىرعا، القانىڭ، تۇتىنعان اعاش جيھازدارىنىڭ، ىدىستاردىڭ، تەرى بۇيىمدارىنىڭ، ەر قارۋى بولعان قىلىش، ايبالتا، سەمسەر، شوقپار، نايزا، قالقان، جەبەنىڭ قۇندىلىعى جايىندا بىلگىسى كەلەتىندەر قاتارى كوپ بولدى. 

سونداي-اق، تۇركى دۇنيەسىنىڭ ۇلى ابىزى قورقىت اتانىڭ «دەدە قورقىت» كىتابىنىڭ درەزدەن نۇسقاسى، نار قوبىز، يۋنەسكو سەرتيفيكاتى، كادەسىيلار، ءۇش ءجۇزدىڭ ءپىرى بولعان مارال يشاننان جەتكەن كوك اسا، مارال بابانىڭ وققاعارى بولعان تاجىگە تيەسىلى كەرەي ەرىنىڭ تۇپنۇسقاسى، قالقاي يشان، سەردالى بەكشورين، ەر سەيتپەنبەت، بۇقارباي باتىر پايدالانعان مورلەردىڭ كوشىرمەلەرى دە كورمە تورىنەن ورىن العان. 

سەمەيلىكتەر ابايدىڭ 1922 جىلى جارىق كورگەن ولەڭدەر جيناعىنىڭ، قىزىلوردانىڭ قازاق اكسر-ءىنىڭ استاناسى بولعانىنا 100 جىل تولۋىنا وراي فوتو جانە ارحيۆتىك قۇجاتتاردىڭ قىر-سىرىنا قانىقتى.  

قىزىلوردا وبلىسى اكىمىنىڭ ءباسپاسوز قىزمەتى