"ونەر ورتالىعىندا" قىزىلوردا قالاسىنىڭ استانا بولعانىنىڭ عاسىرلىق مەرەكەسىنە، قازاقستاننىڭ حالىق ءارتيسى، حالىق قاھارمانى نۇرعيسا تىلەنديەۆتىڭ 100 جىلدىعىنا ارنالعان "اقجاۋىن" مەملەكەتتىك كامەرالىق وركەسترىنىڭ كونتسەرتى ءوتتى.
شىعارماشىلىق كەشتى وبلىس اكىمى نۇرلىبەك نالىباەۆ، مەملەكەت جانە قوعام قايراتكەرلەرى، زيالى قاۋىم وكىلدەرى، ايماقتىڭ ونەرسۇيەر جۇرتشىلىعى تاماشالادى.
كونتسەرت «اق جاۋىن» كامەرالىق وركەسترىنىڭ ورىنداۋىندا سەكەن تۇرىسبەكوۆتىڭ «ۇلى دالا» شىعارماسىمەن اشىلدى. ايماق باسشىسى قۇتتىقتاۋ ءسوز سويلەپ، وركەستر ۇجىمىنا شىعارماشىلىق تابىس تىلەدى.
«قازاقتىڭ كۇي ونەرى – حالقىمىزدىڭ رۋحاني بولمىسى مەن مادەنيەتىنىڭ بيىك تۇعىرى، سارقىلماس اسىل قازىناسى. قوس ىشەكتى دومبىرانى كيە تۇتىپ، شاناعىنان نەبىر تۋىندىنى توگىلدىرگەن كەشەگى قۇرمانعازى، تاتتىمبەت، قازانعاپ، دينادان جەتكەن قاستەرلى ۇلت مۇراسىن جالعاۋشى سەكەن تۇرىسبەكوۆ – ەرەكشە دارىن يەسى. سەكەن كارىمۇلىنىڭ «كوڭىل تولقىنى»، «بالاۋسا»، «دارابوز»، «اق جاۋىن»، «تارباعاتاي»، «اققۋ سازى»، «ەركە قۇسىم»، «كوكتەمىم مەنىڭ»، «قوڭىر قاز» سەكىلدى ءان-كۇيلەرى حالىقتىڭ جۇرەگىنەن ورىن تاۋىپ، ۇلت رۋحانياتىن كەمەلدەندىرە ءتۇستى. ەلىمىزدىڭ دارىندى پەرزەنتى سەكەن اعامىزدىڭ شالقار شابىتىنان تۋعان شىعارمالارى بويعا رۋح بەرىپ، جۇرەكتى تەربەيدى. دارىن يەسىنىڭ كۇيشىلىك ونەرى جەكە ورىنداۋشىلىقتان اسىپ، «اق جاۋىن» مەملەكەتتىك كامەرالىق وركەسترىنە ۇلاستى.
بۇل – تالماي ەڭبەك ەتۋدىڭ، ۇزاق جىلعى ىزدەنىستىڭ، قابىلەتتى جاستاردى ماڭىنا جيناپ، ەرىنبەي ۇيرەتۋدىڭ ناتيجەسىندە جۇزەگە اسقان ابىرويلى ءىس. كۇي – ومىرشەڭ ونەردىڭ بىرەگەيى. بابالارىمىزدىڭ ۇرپاقتان-ۇرپاققا قاستەرلەپ جەتكىزگەن ءتول مۇراسىن كەڭىنەن ناسيحاتتاۋدا، بۇگىنگى بۋىننىڭ ساناسىنا سىڭىرۋدە «اق جاۋىن» مەملەكەتتىك كامەرالىق وركەسترىنىڭ ەڭبەگى زور.
بۇگىنگە دەيىن الەمنىڭ بىرقاتار ەلدەرىنىڭ ۇزدىك ساحنالارىن اسەم سازبەن تەربەپ، قازاق ونەرىن اسقاقتاتقان وركەستر ۇجىمىنىڭ ەڭبەگى قاشاندا قۇرمەتكە لايىق»، – دەدى نۇرلىبەك ماشبەكۇلى.
كەشتە قۇرمانعازىنىڭ «اقساق كيىك»، «قايران، شەشەم»، نۇرعيسا تىلەنديەۆتىڭ «اتا تولعاۋى»، «بوورلاشتارىم»، دينا نۇرپەيىسوۆانىڭ «اسەم قوڭىر» كۇيلەرى ورىندالدى. جۇرەكتىڭ نازىك قىلىن شەرتەتىن كۇشى بار، تىڭداۋشىسىن وي مەن سەزىم تۇڭعيىعىنا تارتاتىن تۋىندىلاردى تىڭداۋعا كەلگەن كورەرمەننىڭ قوشەمەتى ەرەكشە بولدى.
شىعارماشىلىق كەشتە ونەر كورسەتكەن سەكەن كارىمۇلىنا جانە بارشا تالانتتارعا وبلىس اكىمىنىڭ ىقىلاس گۇلى تابىستالدى.
